Deur Emsie Martin

Verbeel jou jy loop in die straat en skielik kom daar ʼn trok van nêrens reguit op jou afgepeil. Jy ervaar ʼn intense gevoel van vrees, jou hart klop onbedaarlik, jy slaan in sweet uit en jy raak stom van vrees. Of verbeel jou jy is besig om inkopies te doen of klaar te maak vir werk en jy ervaar hierdie gevoel. Is dit ʼn angsversteuring of paniekaanval? Die twee is so na aan mekaar dat dit moeilik is om te onderskei.

Wat is ʼn angsaanval?

ʼn Angsaanval is ʼn skielike oorweldigende gevoel van vrees wat tot fisiese en emosionele reaksies kan lei. ʼn Angsaanval duur gewoonlik 20-30 minute en dan bedaar dit weer.

• Voel jy gedurig gespanne, bekommerd en angstig?
• Beïnvloed jou angs jou werk, skool of gesinsverantwoordelikhede negatief?
• Is jy bang dat jy beheer gaan verloor?
• Word jy dikwels deur vrees oorval?
• Vermy jy daaglikse situasies omdat jy angstig word?
• Kry jy soms hartkloppings?

Wanneer gevaar waargeneem word, reageer die liggaam deur gereed te maak om te veg of te vlug. Angs veroorsaak dus ʼn hele reeks fisiese simptome of reaksies. Dikwels word angs gesien as ʼn fisiese siekte en mense wat aan angs ly, sal vir baie doktersafsprake gaan voordat angs gediagnoseer word.

Sommige mense glo paniek- of angsaanvalle gebeur net met mense wat hiperopgewonde raak en hulle te veel oor dinge bekommer.

Wat is die oorsaak?

• Geneties (familiegeskiedenis)
• Aanhoudende stres
• Verandering in die maniere waarop seker dele van jou brein funksioneer
• Alkohol- en dwelmmisbruik
• Depressie
• Mediese toestande, bv. asma, lae bloedsuiker, ooraktiewe skildklier, hartprobleme

Paniekaanval of angsaanval

Hoewel die twee dieselfde simptome deel, is ʼn paniekaanval gewoonlik meer ekstreem en onverwags, sonder ʼn duidelike oorsaak. Dit gebeur skielik en verdwyn weer vinnig.

ʼn Angsaanval word veroorsaak deur oormatige of uitgerekte bekommernis oor verskeie daaglikse gebeure en vind gewoonlik plaas in afwagting van ʼn stresvolle gebeurtenis en kan oor ’n tydperk van dae of weke gebeur.

Partye mense het slegs een of twee paniekaanvalle in ’n leeftyd.  As jy egter herhaaldelike paniekaanvalle kry of bekommerd is oor wanneer die volgende een gaan gebeur, het jy dalk ’n paniek- of angsversteuring.

Fisiese simptome mag die volgende insluit:

Daar is geen waarskuwingstekens nie, maar daar is gewoonlik die volgende simptome:

• Hartkloppings
• Kortasem
• Hoofpyn
• Oormatige sweet
• Onbeheerbare bewerigheid
• Borspyn of ongemak
• Voel duiselig en onvas op jou voete
• Ongesteldheid van die maag
• Kouekoors of warm gloede
• Tinteling of dooie gevoel in vingers en tone
• Voel of jy versmoor
• Moegheid
• Slaaploosheid

Diagnose en behandeling

Paniekversteuring is ʼn mediese toestand en is behandelbaar. Almal ervaar dit verskillend en dit is belangrik om mediese hulp te kry.

• Jy moet verstaan wat in jou liggaam gebeur wanneer jy ʼn paniekaanval kry.
• Stel vas wat die onderliggende oorsaak is.
• Kry die beste behandeling.
• Gun jouself ’n bietjie alleentyd.
• Probeer om stadiger asem te haal en jou gedagtes te kalmeer.
• Gebruik al jou sintuie om vir jouself ʼn ontspannende toneel voor te stel.
• Gaan draf of stap ʼn ent.
• Haal stadiger of in ʼn papiersak asem.
• Luister na jou gunstelingmusiek.
• Fokus op die hede en voorwerpe rondom jou wat jou gelukkig maak.
• Haal diep asem en strek jou liggaam uit.

As jy meer wil lees oor verskillende angsversteurings, kan jy die Suid-Afrikaanse Depressie-en-angsgroep (Sadag) se webwerf  http://www.sadag.org/ besoek.

Bronne

https://lig.christians.co.za/as-n-angsaanval-jou-lamle/

http://www.sadag.org/index.php?option=com_content&view=article&id=1878&Itemid=157
https://www.vrouekeur.co.za/nuus-vermaak/behandel-angsaanvalle-13-wenke