Cyril Blackburn
Kankergevaartekens is dikwels vaag en in baie gevalle is daar min tot geen simptome nie. Om die waarheid te sê, prostaatkanker – die algemeenste kanker onder mans – is een van die kankers met die minste ooglopende simptome.
Navorsing van die Universiteit van Texas se MD Anderson-sentrum vir kankervoorkoming het bewys dat mans hulle dikwels daaraan skuldig maak om nié vir jaarlikse ondersoeke te gaan of gereeld ʼn dokter te besoek nie. Die gevolg hiervan is dat baie mans kankergevaartekens ignoreer of bloot nie raaksien nie – iets wat enige kankerlyer duur te staan kan kom.
Therese Bevers, direkteur van die MD Anderson-sentrum, werp lig op sommige van die vernaamste simptome of gevaartekens wat dikwels deur mans geïgnoreer word.
ʼn Buitengewone knop
ʼn Knop onder jou vel kan ʼn aanduiding van kanker wees. Dié knoppe kom gewoonlik voor in die bors, testikels, limfknope en sagte weefsels, soos ligamente. Só ʼn knop moet dadelik met jou dokter bespreek word.
ʼn Verandering in jou testikels
As een of albei van jou testikels abnormaal swel of groei, kan dit ook ʼn aanduiding van kanker wees. Wanneer ʼn man se testikels swaar en geswel voel, is dit dikwels ʼn waarskuwing dat hy lankal by ʼn dokter moes gewees het. Al dié simptome kan op testikulêre kanker dui.
ʼn Verandering in jou badkamergewoontes
As jy konstant badkamer toe moet gaan, en in baie gevalle ook pyn het wanneer jy urineer, kan dit dui op blaas- of prostaatkanker. Ander tekens om voor uit te kyk, is bloed in jou urine of stoelgang. Dit is selfs belangrik om te onthou dat diarree wat nie opklaar nie, ook gevare inhou.
ʼn Verandering in jou velkleur
Dit is nie nét diegene wat buite in die son werk wat velkanker kry nie. Bevers sê as jy sere het wat nie genees nie of vratte op jou lyf wat van kleur verander, kan dit dikwels dui op velkanker. Elke mens is veronderstel om sy vel konstant dop te hou vir enige verandering in kleur of sensitiwiteit.
ʼn Verandering in jou spysvertering, of wanneer jy moeilik sluk
ʼn Langdurige brandende sensasie in jou keel of bors moenie geïgnoreer word nie, maan Bevers. Sy sê ʼn skielike verandering in jou spysvertering of wanneer dit moeilik is om te sluk, het niks met ouderdom te make nie. Inteendeel, dit kan moontlik simptome van esofageale, maag- of keelkanker wees.
ʼn Aanhoudende hoes of heesheid
As jou hoes of heesheid vir langer as drie weke aanhou, is dit uiters gevaarlik. Selfs al is jy ʼn roker is ʼn seer keel of hoes vir ʼn tydperk van drie weke nie normaal nie. Aanhoudende heesheid, kortasemrigheid of as jy bloed hoes, kan alles tekens van longkanker wees.
Veranderinge in jou mond
Wanneer jy soggens of saans tande borsel, moet jy jou mond noukeurig deursoek. Wit kolle in jou mond of op jou tong kan dui op ʼn voorkankertoestand wat later in mondkanker verander. Sere, onverklaarbare bloeding of ʼn uiterste sensitiwiteit in jou mond is veral redes om ʼn dokter te spreek.
Onverklaarbare gewigsverlies
As jy konstant gewig verloor sonder dat jy jou dieet- of oefenprogram te verander het, moet jy ook ʼn dokter gaan spreek. Om sonder rede gewig te verloor, is ʼn gevaarteken van pankreas-, maag-, esofageale of longkanker.
ʼn Konstante moegheid
As jy konstant moeg is, ongeag die hoeveelheid slaap wat jy kry en dieetveranderings wat jy aanbring, kan dit ʼn teken van leukemie wees, of selfs ook kolon- of maagkanker.
Aanhoudende pyn
Konstante pyn die rug, hoofpyn of maagpyn wat nie wil opklaar nie, kan benewens kanker op talle ander kroniese siektes dui.
Bevers sê dat geeneen van dié simptome definitief op kanker dui nie, maar dat dit belangrik is om te onthou om jaarliks vir mediese ondersoeke te gaan om te verhoed dat kanker jou onverhoeds betrap.
Vir meer inligting, besoek die MD Anderson-sentrum vir kankervoorkoming se webblad.
Bron