• Teken in
  • Ander Artikels

    Wat veroorsaak maagsere?

    Diegene wat ongelukkig genoeg is om aan maagsere te ly sal baie goed weet hoe ongemaklik en pynlik dit is.

     

    Maar hoe weet jy of jy werklik een het, en hoe ontwikkel dit?

     

    Jay Marks MD, bydraer tot MedicineNet.com, sê maagsere is sere in die voering van die maag. “ʼn Peptiese maagseer is ʼn breuk in die binneste voering van die esofagus, maag of duodenum. ʼn Peptiese maagseer van die maag word ʼn gastriese maagseer genoem. Peptiese maagsere kom voor wanneer die voering van hierdie organe weggevreet word deur die suur verteringsappe wat deur die maagselle afgeskei word.

     

    “’n Peptiese maagseer verskil van ʼn erosie want dit gaan dieper in die voering van die esofagus, maag of duodenum in en veroorsaak meer van ʼn inflammatoriese reaksie van die betrokke weefsel.”

     

    Wat veroorsaak maagsere?

     

    Daar is duidelike mediese konsensus dat, in teenstelling met wat algemeen geglo word, maagsere nie deur stres of swak eetgewoontes veroorsaak word nie. “Maagsere word nie noodwendig deur een enkele faktor veroorsaak nie,” sê Steven Kim MD, bydraer tot Healthline.com.

     

    Hy brei uit op hierdie stelling deur te sê dat maagsere een van baie oorsake kan hê en dat genetika, medisyne en infeksies almal ʼn rol te speel het. Die eerste is infeksie met die bakterie Helicobacter pylori (H. pylori). Volgens die National Digestive Disease Information Clearinghouse, word meer as die helfte van maagsere veroorsaak deur ʼn infeksie met H. pylori.

     

    Tweedens kan langtermyngebruik van nie-steroïdale geneesmiddels soos asperien en ibuprofeen ook ʼn nadelige effek hê. Die derde faktor is buitensporige suur in die maag, wat verbind kan word met lewenstylfaktore soos om te rook en drankmisbruik, sowel as genetika. Zollinger-Ellison-sindroom mag ook ʼn oorsaak wees. Dit is ʼn rare siekte wat die liggaam oortollige maagsuur laat produseer.

     

    Dr. Melinda Ratini, bydraer tot WebMD, voeg behandeling deur bestraling en ernstige siektes by die lys. Ouer mense (50+) loop ook ʼn groter risiko om maagsere te ontwikkel.

     

    Dit wil nie sê dat sekere voedselsoorte, veral dié gelaai met vet en speserye, maagsere nie vererger nie.

     

    Wat is die simptome?

     

    Volgens die VK Nasionale Gesondheidsdiens (NHS), is maagpyn die eerste simptoom wanneer dit by maagsere kom. Die pyn wat deur ʼn maagseer veroorsaak word, skiet uit van die middel van jou maag op na die nek toe, af na jou naeltjie, of selfs deur jou rug. Dit kan vir ʼn paar minute tot ʼn paar uur duur. Dit is geneig om binne ʼn paar uur nadat jy geëet het en ook gedurende die nag voor te kom.

     

    Ander simptome sluit in slegte spysvertering, sooibrand, gebrekkige eetlus en gewigsverlies. Kim voeg naarheid, braking, opgeblasenheid en pyn terwyl jy eet by die lys.

     

    Bronne

     

    Marks, J. 2016. “Peptic ulcer disease”. http://www.medicinenet.com/peptic_ulcer/article.htm.

     

    Ratini, M. 2014. “What causes ulcers?” http://www.webmd.com/digestive-disorders/digestive-diseases-peptic-ulcer-disease#1

     

    NHS. 2015. “Symptoms of stomach ulcer”. http://www.nhs.uk/Conditions/Peptic-ulcer/Pages/Symptoms.aspx.

     

    Chandler, S. 2013. “What to eat & not to eat when you have an ulcer”. http://www.livestrong.com/article/347146-what-to-eat-not-to-eat-when-you-have-an-ulcer/.

     

     

     

     

    • 55
    •  
    •  
    •  

    Rook: Hoe om (met sukses) op te hou

    Jy wil so graag ophou rook en jy het al voorheen probeer, maar dit is waarlik een van die moeilikste gewoontes om van ontslae te raak. Hierdie jaar mag die jaar wees om dit te doen aangesien die ekonomie ons met baie minder kontant in die sak gaan laat om op luukse goedjies soos sigarette te blaas.

    Wat presies is die perfekte metode om die gewoonte hok te slaan? Dit is die vraag wat miljoene der miljoene mense wêreldwyd hulself al vir dekades vra.

    Terwyl daar geen maklike of volkome pynlose opsies is nie (anders sou miljoene mense sommer vandag ophou), is daar etlike goeie en effektiewe maniere om op te hou rook. Jy sal ook allerlei fisiese, logistieke en geestelike uitdagings in gedagte moet hou. Van op-die-daad-ophou tot meer geleidelike metodes, kom ons kyk na die proses wat jou lewe in ʼn nuwe rigting sal stuur:

     

    Stel ʼn datum vas

    Kies ʼn gepaste datum binne die volgende twee weke en begin dan voorberei voordat jy jou motivering verloor. As jy hoofsaaklik by die werk rook, hou eerder oor die naweek op sodat jy tyd het om aan te pas.

     

    Vertel almal

    Lig die mense in jou lewe in dat jy van voorneme is om op te hou en vra hulle om jou in die proses aan te moedig en te help. Kry ʼn “quit-buddy”, soos ʼn goeie vriend of betroubare kollega wat ook die gewoonte wil los. Julle wederkerige aanmoediging en dissipline sal die proses verder vergemaklik.

     

    Antisipeer en verwyder

    Jy kan daarop wed dat versoekings gedurende hierdie tydperk oor jou pad sal kom.  Die meeste mense wat weer begin rook, doen dit binne die eerste drie maande nadat hulle opgehou het. Verwyder dus die uitdagings en lokvalle voor die tyd deur ontslae te raak van alle sigarette, sigaretaanstekers en asbakkies. Kry die reuk van rook uit jou huis en kar.

    Baie belangrik, bly weg van rokers totdat jy uit die rooi sone is. Vermy alkohol aangesien dit ʼn gevaarlike sneller is en probeer om eerder oor te skakel na nie-alkoholiese drankies.

    Die meeste rokers wil graag ʼn sigaret geniet na een of ander nagereg na ʼn maaltyd. Die Amerikaanse Kankervereniging stel voor dat jy hierdie belustigheid bedwing deur eerder ʼn soet vrug of ʼn klein snytjie koek te eet.

     

    Oefen, eet gesond en drink baie water

    Oefening sal jy aandag aflei van ʼn drang en om water te drink het inherente voordele maar sal rook ook sleg laat smaak (eintlik soos as). Die eet van gesonde kossoorte soos vrugte en (onopgesmukte) springmielies sal nie net jou mond besig hou nie, maar is ook gepaste plaasvervangers vir meer vetterige kosse wat rokers wil nuttig as ʼn “koesterkos” beloning.

     

    Medisyne en ander metodes

    Soms is dit nodig om jou dokter of apteker te raadpleeg. ʼn Verskeidenheid medisyne en nie-natuurlike metodes is beskikbaar vir rokers wat geleidelik van die gewoonte wil ontslae raak. Een van hulle is e-sigarette, elektroniese sigarette wat jou afhanklikheid van nikotien wil verlaag terwyl die verstandelike deel van rook aangespreek word. Dan is daar Nikotienvervangingsterapie (NVT), wat daarop gemik is om die fisiese onttrekkingsimptome te verlig.

     

    Kweek nuwe gewoontes

    Dit is waarskynlik een van die mees essensiële gedeeltes betrokke by die afleer van die rookgewoonte. Baie mense rook omdat dit ʼn gewoonte word en hulle rook wanneer hulle verveeld is. Dit is dus uiters belangrik dat jy ʼn nuwe stokperdjie begin of ander vorms van kitsbevrediging vind – soos om videospeletjies te speel, te lees of te gaan swem – om die rookgewoonte te vervang.

     

    Bronne:

    American Cancer Society. 2014. “Getting help with mental part of the addiction”. http://www.cancer.org/healthy/stayawayfromtobacco/guidetoquittingsmoking/guide-to-quitting-smoking-help-mental.

    American Cancer Society. 2014. “Getting help with physical part of the addiction”. http://www.cancer.org/healthy/stayawayfromtobacco/guidetoquittingsmoking/guide-to-quitting-smoking-help-phys-nrt

    HelpGuide.org.  n.d. “How to quit smoking”. http://www.helpguide.org/articles/addiction/how-to-quit-smoking.htm

    Smokefree.gov. n.d. “How to manage cravings”. http://smokefree.gov/cravings

    • 132
    •  
    •  
    •  

    Top 6 reëls vir wintergewigsverlies

    Glynis Horning

     

     

    Korter, kouer dae kan dit onmoontlik laat voel om buitentoe te gaan en te oefen (O, die verskonings wat ons uitdink!) en die versoeking is groot om te swig voor soet, styselrige kos om ons op te warm en te vertroos. Maar ongelukkig gaan hierdie plesiertjies gepaard met gewigstoename. Maak hierdie winter dié een waar jy jou gesondheid bo jou gerieflike verskonings plaas.

    Geregistreerde dieetkundige dr. Suna Kassier, ʼn senior lektor in die Departement Dieetkunde en Menslike Voedingkunde by die Universiteit van KwaZulu-Natal, deel haar reëls om daardie wintervetjies te pypkan.

     

    Reël #1: Moenie die weer blameer omdat jy nie jou neus by die deur uitsteek nie!

    Moenie die winter agter slot en grendel bly nie. Matige oefening buite, soos ʼn vinnige stappie, verbrand nie net kilojoules nie, maar demp jou aptyt. Deur dit in die fris winterkoue te waag, is jy nie naby versoeking soos die koskas of yskas is nie. Plus, jy kom weg van al die winterkieme, terwyl jy jou immuunstelsel opbou deur gereelde oefening.

    Investeer in ʼn warm baadjie en werf ʼn stapmaat, of nog beter, maats. As jy in die versoeking is om binne te bly, kan hulle jou motiveer om aan die gang te kom.

     

    Reël #2: Beheer die wintersnoephappiefeeste!

    Wanneer jy binnenshuis jou knus toewikkel om ʼn fliek te kyk of ʼn boek te lees, waak daarteen dat hierdie ekstra winter-ontspanningstyd nie gepaard gaan met ʼn snoephappiefees nie. As jy lus voel om aan iets te knibbel, hou vrugte byderhand, of groentestokkies wat jy in ʼn lae-kilojoule slaaisous kan doop.

    Moet nooit ʼn pak aartappelskyfies saamneem TV toe nie met die gedagte dat jy net ʼn paar gaan eet en die res vir later bêre nie. Springmielies is ʼn vullende lae-energie snoephappie-alternatief, maar dit moet die mikrogolfweergawe wees. Die pakkies wat in die winkels beskikbaar is, bevat vet en hope sout.

     

    Reël #3: Weeg jouself sodra die winter aanklop

    Dit kan opgevolg word deur weeklikse weegsessies om te verhoed dat die gewig jou bekruip. As jy verlede jaar meer geweeg het toe die temperatuur begin daal het, wees daarvan bewus wanneer jy los klere dra – dit is nie ʼn lisensie om jou aan kos oor te gee net omdat jou broek nie styf pas nie.

     

    Reël #4: Moenie ontbyt oorslaan omdat jy op ʼn wintersoggend bietjie laat slaap nie

    Moenie op werksdae ʼn paar minute langer in die bed lê omdat dit koud is nie. Dit kan daartoe lei dat jy ontbyt sal moet oorslaan omdat die tyd jou ingehaal het. Diegene wat gereeld ontbyt eet, is minder geneig om belustig te raak of met volgende maaltye dit te oordoen, want hulle bloedsuikervlakke bly egalig.

     

    Reël #5: Reguleer jou trooskos-inname

    Wanneer jy “trooskos” voorberei, let op wat in die kastrol of pan beland. Ekstra kaas en ryk souse kan die kilojoule-inhoud van ʼn maaltyd aansienlik verhoog. As jy in die versoeking kom om ʼn tweede porsie te neem, drink eers ʼn glas water voordat jy swig. Dit sal jou help om te bepaal of jy nog honger is, of bloot ʼn tweede porsie wil geniet omdat die kos so lekker smaak.

     

    Reël #6: Dink voedsame voedsel-opsies

    Trooskos soos soppe en bredies kan smaaklik, voedsaam en vullend wees sonder om die vetrolletjies te laat aanpak indien jy baie groente byvoeg. Gebruik peulgroente soos boontjies as ʼn plaasvervanger vir vleis, en beperk die gebruik van olie in die gaarmaakproses.

    As jy lief is vir vleis, maak seker jy hou jou inname matig en sny enige sigbare vet (en hoendervel) af voordat jy dit gebruik.

     

    Bron: Clicks

    • 18
    •  
    •  
    •  

    Watter soort matras is die beste vir laerug-pyn?

    Rugpyn is een van die hoofredes waarom mense in hul middeljare begin mobiliteit verloor. Pyn kan mense verhoed om aan fisiese aktiwiteite deel te neem, wat dit vir hulle nog moeiliker maak om ʼn gesonde gewig te handhaaf en hul krag, stamina en balans te behou soos hulle ouer word. Die behandeling en bestuur van rugpyn as gevolg van beserings of gesondheidsprobleme is dus deurslaggewend vir ʼn gesonde en aktiewe lewe.

    Omdat die meeste mense ongeveer een-derde van hul lewens in die bed deurbring, is die keuse van die regte matras noodsaaklik vir die bestuur van laerug-pyn. Dit kan die verskil beteken tussen slaap in die nag en funksioneer die volgende dag.

    In die verlede het dokters dikwels baie harde matrasse aanbeveel, maar ʼn opname onder 268 mense met laerug-pyn het gevind dat dié wat op ortopediese (baie harde) matrasse slaap die swakste slaapgehalte het. Daar was geen verskil in slaapgehalte tussen diegene wat mediumharde en harde matrasse gebruik het nie.

    Aan die ander kant kan sagte matrasse ook problematies wees. Hoewel ʼn sagte matras wat jou liggaam se natuurlike kurwes aanneem, kan help om die gewrigte in lyn te bring, kan jy ook so diep insink dat jou gewrigte draai en begin pyn in die nag.

    As jy wil uitvind of ʼn harder matras beter sal voel as die een wat jy tans gebruik, probeer om ʼn laaghoutbord onder die matras te sit om die beweging van die bedvere te demp, of probeer om jou matras op die vloer te sit.

    Jy kan natuurlik ook na ʼn matraswinkel toe gaan en ʼn verskeidenheid modelle uittoets, maar onthou dat wat vir ʼn paar minute in ʼn winkel gerieflik voel nie noodwendig ʼn goeie nagrus beteken nie. ʼn Meer betroubare toets is om te kyk hoe jy voel nadat jy weg van die huis af op verskillende tipes matrasse geslaap het ─ byvoorbeeld in ʼn hotel of by ʼn vriend of familielid se huis.

     

    Bron: Harvard Medical School

    • 28
    •  
    •  
    •  

    Rekenaarskerms en jou oë: Simptome en raad

    Lize-Mari Labuschagne

     

    Deesdae behels almal se werk minder papiere en meer rekenaarwerk en alhoewel dit baie ideaal klink omdat dit meer georganiseerd is, plaas dit onnodige spanning op jou oë. Oogprobleme wat deur rekenaars veroorsaak word, word geklassifiseer onder Rekenaarvisiesindroom (RVS). Dit word nie as een groot probleem gesien nie, maar eerder as ʼn hele reeks oogprobleme en pyne.

     

    Wat is die simptome?

    Daar is geen bewyse dat rekenaars langtermynskade aan mense se oë aanrig nie, maar die gereelde gebruik daarvan kan pyn en ongemak veroorsaak. Hier is ʼn paar probleme wat kan voorkom:

    • Versteurde visie
    • Dubbelvisie
    • Droë, rooi oë
    • Oogirritasie
    • Hoofpyn
    • Nek- of rugpyn

    As jy nie iets daaraan doen nie, kan dit jou werkproduktiwiteit ook beïnvloed.

    All About Eyes gee wenke om hierdie spanning en pyn te verlig:

     

    • Laat jou oë ordentlik toets

     

    As jy nie die afgelope jaar ʼn roetine-oogtoets ondergaan het nie, skakel jou oogkundige om enige oogprobleme te voorkom of te behandel.

     

    • Gebruik behoorlike verligting

     

    Volgens All About Vision word die meeste oogstremming veroorsaak deur skerp lig van buite of helder lig binne die kantoor. As jy ʼn rekenaar gebruik, moet jou omringende ligting ongeveer die helfte so helder wees as wat gewoonlik in die meeste kantore voorkom.

     

    • Minimaliseer glans

     

    Glans op mure en afgewerkte oppervlaktes, sowel as weerkaatsing op jou rekenaarskerm, kan ook oogstremming veroorsaak. Oorweeg ʼn antiglansskerm op jou monitor en verf helder wit mure ʼn donkerder kleur met ʼn mat afwerking.

     

    • Knip jou oë meer

     

    Knip is baie belangrik wanneer jy op ʼn rekenaar werk. Knip maak jou oë klam om droogheid en irritasie te voorkom.

     

    • Neem gereeld ʼn ruskans

     

    Om jou risiko vir rekenaarvisiesindroom en nek-, rug- en skouerpyn te verminder, neem gereeld ʼn ruskans tydens jou rekenaarwerkdag.

     

    • Oorweeg ʼn rekenaarbril

     

    Vir optimale gemak voor jou rekenaar kan jy baat vind by jou oogkundige om jou brilvoorskrif te verander om ʼn persoonlike rekenaarbril te skep.

    Volwassenes is nie die enigstes wat hierdeur geraak word nie maar ook kinders wat op rekenaars en tablette by die skool werk.

     

    Bronne

    http://www.webmd.com/eye-health/computer-vision-syndrome#1

    http://www.allaboutvision.com/cvs/irritated.htm

    • 465
    •  
    •  
    •  
    Top

    Registreer / Register

    Maak toe / Close